III

1 His rebus adducti et auctoritate Orgetorigis permoti constituerunt ea, quae ad proficiscendum pertinerent, comparare:

iumentorum et carrorum quam maximum numerum coemere, sementes quam maximas facere, ut in itinere copia frumenti suppeteret, cum proximis civitatibus pacem et amicitiam confirmare.

2 Ad eas res conficiendas biennium sibi satis esse duxerunt;

in tertium annum profectionem lege con firmant.

3 (Ad eas res conficiendas) Orgetorix (deligitur) legationem ad civitates suscipit.

4 In eo itinere persuadet Castico, Catamantaloedis filio, Sequano, cuius pater regnum in Sequanis multos annos obtinuerat et ab senatu "populi Romani amicus" appellatus erat, ut regnum in civitate occuparet (quod pater ante habuerit);

5 itemque Dumnorigi Haeduo, fratri Diviciaci, qui eo tempore principatum in civitate obtinebat ac maxime plebi acceptus erat, ut idem conaretur, persuadet eique filiam suam in matrimonium dat.

6 Perfacile factu esse illis probat conata perficere propterea, quod ipse suae civitatis imperium obtenturus esset.

7 Non esse dubium, quin totius Galliae plurimum Helvetii possent.

Se suis copiis suoque exercitu illis regna conciliaturum confirmat.

8 Hac oratione adducti inter se fidem et ius iurandum dant et regno occupato per tres potentissimos et firmissimos populos totius Galliae imperio sese potiri posse sperant.